Home    Mitglieder    English    Op Platt    Musik  

  Berichte
  Förderer
  Gesellschaft
  Kontakt
  Links


  facebook

Fastelovend in Bad Jodesberg



Kölle, dat wes doch jeder Panz, is de Middelpunk vun däm janze Fastelovendsjedöns.

Normalerwies jit et in eenem Johr vier Johreszicke: et Fröhjohr, dä Summer, dä Hervs un dä Winter. Ävver in ze Kölle un drum eröm han de Lück en fünefte Johreszick, dä Fastelovend. Un dä Fastelovend jehüürt jenau esu zo Kölle wie dä Dom.

 

Für all, die net wisse, wo Bad Jodesberg liett: Bad Jodesberg is noh singer Vereinnahmung dürch Bonn jetzt eene Deil vun dä Stadt Bonn, ävver selevsverständlich dä schönste Deil. Et liett knapp en Stund von Kölle met singer gruusse Kirch, däm Dom, entfänt.

Un wegen singer Nöh zo Kölle is dä Fastelovend in Jodesberg fass es su wie dä in Kölle, nu e beßje kleener.

 

Ävver wo kütt dä Fastelovend ejentlich hä?

Für langer Zick schon han de Minsche Feste gefiert un dabei jedrunke, jejesse, jeschwaad un jelaach. Se han et dann schnell e beßje jet üvverdrivve mit dä Fiererei und dat hätt dä huhe Häre vun dä Kirch und dä Politik net jefalle. De huhe Häre us dä Kirch han dann jesaat: „Su jet dat nit wigger met dä Fiererei. Für Ostere möt Ihr vierzich Dach faaste.“  Vun dä Kanzel us de Lück jeprädich: „Lot de Fingere weg vum Fleesch!“ Op Latein heeß dat „carne vale!“. Dovun stamp dat Woord „Karneval“ avv.

Zu ´ner spädere Zick koomen us Venedig, dä Stadt in Italien, die midden im Wasser liett, janz finge Dingere,  die me sech für et Jeseech haale moot. Met finge Jewänder us Sammet un Brockat jeschmöck, wor me dann maskiert. Alles zesamme han se dofür dann jesaat: Dat is dä Fastelovend us Venedig.

De kölsche Lück mooten sech jett ze laache söke, weil et Levve unger de Besatzungshäre vum Napoleon, de Franzuuse, un dann och späde noch de Preusse, hatt genoch wor. Do han se sech an de Fastelovend in Venedig erinnert un han sech op ihr Feste un Danzereie maskiert. Dobei han se dann e bissje de Nut usem normale Levve verjesse.

In Kölle han de Lück 1823 eetstemol su richtig Fastelovend gefiiert, ävver se mooten immer op de preussische Besatzung aachte, denn de han für alles Regele opjestellt. Ab dann jing et su richtig loss met däm Fastelovend in Kölle un Umjebung. Dä eetste Fastelovendsvereen wuurd 1823 in Kölle jejründt. Im Bonn woren se nu e bissje langsamer, he stammp dä eetste Vereen vun 1872.

Im Fastelovend han sech de Lück zueets dann lostig jemaaht üvver de franzüsische un späder de preussische Besatzungen: Se han ihr Vereene noh dem Militär jenannt un han sech Uniforme jenäht, de wie de vun dä Besatzung ussohen. Späder han de Lück dann auch dä Besatzungsmach vuum eetste Weltkreech und de Nazis verhohnepippelt.

 

Hück is Bad Jodesberg zwa eene Bezirk in dä Stadt Bonn, ävver bis zu dä Enjemeendung in 1969 woor Jodesberg selveständig. Un dat is och dä Grund dofür, woröm in Jodesberg bis hück ne eijenständije Fastelovend jefiert wid.

 

Sid 1893 hätt dä Jodesberger Turnvereen Fastelovendssitzunge un Bäll orjanisiert. Dä Häre vum dritte Reich dät dat ävver net in de Krom passe un dorömm han se de janze Turnvereene forbodde, Fastelovendssitzunge avzohaale.

E paar janz Schlaue us em Turnvereen han dorovhin  janz eenfach en neue Jrupp jegröndt, die selveständig für dat Fastelovendsfiere zoständig wor. De Jrupp han se dann de Jodesberger Stadtsoldaate jenannt. Deshalv kamm  me saache, dat de Stadtsoldaate us dä eetste Fastelovendsjecke vun 1893 entstande senn.

Dä Name „Jodesberger Stadtsoldaate“ kütt, wie och dä Name vun ville Vereene us dä kölsche Jäjend,  vun dä Stadsoldaate, die et em 17. un 18. Johrhundert joov. Un net nur dä Name, och die Uniforme sullen su e bissje jett ussehn wie zu dä Zick. We de Soldaate vum Ärzbischoff us Köllle sinn de Uniformsfärve ruut, jröön und wiess. Om Kopp han de Funke ene Hot mit drei Ecke, dä Dreispitz. Als Waffe han se ene Zachabel oder en Kalvumm, dat es en Scheeßjewehr us Holz, mit demm me ävver net scheeße kann, weil do nämlich e Strüssje vüür dropp steck. We fröher, un och hück noch beim Barras, han all Stadtsoldaate ene Deensjrad, we zom Beespill Rekruut, Sergeant oder Jeneral. Jedes Johr wierd de Uniform mit eenem neue Orde jeschmöck.

 

De Fastelovendszick jeht immer vum elefte em elefte um elef Uhr elef bis zum Äschermittwoch, dämm Dach, an dämm de Faastezick bis Ostere lossjeht. De Zahl elef is für de Fastelovend janz wichtig. Jebuurdsdaache im Fastelovend zällen immer met elef Joohr un de Sitzunge werden jeleitet vun däm Eleferroot.

 

Kölle is mit mie wie üvver 100 Fastelovendsvereene, die in dä letzte 180 Johr jejründt wuurden, dä Middelpunk vum Fastelovend in oser Jäjend. In Kölle wierd jedes Johr e neu Dreijestirn proklamiert. Et Dreijestirn besteht us Prinz, Bauer un Jungfrau. De Drei sinn de övveste Härrscher in dä Fastelovendszick.

In Bonn und Bad Jodesberg ham me keen Dreijestirn, sondern e Prinzepaar mit enem Prinz un ner Prinzessin. In Bonn heess de Prinzessin „Bonna“ und in Bad Jodesberg heess dat Mädche „Jodesia“.

 

In Jodesberg ham me fass zwanzich Fastelovendsvereene, de in dä Fastelovendszick, och Session jenannt, e janz Deil Feste un Sitzungen orjanisiere. Eene vun dä Vereene sinn de Jodesberger Stadtsoldaate, die uch zo eener dä grüßere Jesellschafte jehüüren. De Jodesberger Stadtsoldaate han su üvver dä Domme jepeilt 120 aktive un dann noch 200 inaktive Mitgleeder. De Inaktive bezahle ihre Beidrag un don sunst net vell. De Aktive han de Uniforme an, de me ovven at beschrivve han. In dä Jesellschaf jiit et verschiedene Korps, z.B. et Kinderkorps, wo de Pänz danze don. Dä kleenste Panz ist ehts dree Johr alt. Dann jitt et noch de Streitkräfte, de Kavallerie met de Päd, dä Landsturm, dä Senat un dä gruuße Rat. Dat senn de leeve Lück, die immer schon emol de Nüssele jevve. De Aale, die net mie künne oder net mie wulle, sinn de Veterane. Für dat janze bruch me natürlich och jett Musik, dafür jitt et de Musikkapell.

Üvver et janze Johr verdeilt üben de Jonge ihr aale Landsknechtdänze, während de Mädche janz modän oder mit enem Can-Can eröm hüppe. Trainiere müssen ooch de kleene Pänz und de Reiter met ihre Päd, um für de Fastelovendszick parat ze sinn. De Inaktive und de Lück vum gruuße Rat senn och wichtig für dä Vereen, denn uhne denne ihr Nüssele könnt ene Vereen net bestonn. An de Spitz vun dä Jodesberger Stadtsoldaate steht dä eeste Vürsitzende, dat is im Moment dä Dieter Nussbaum.

 

Wie ovven at jesaat, fängt dä Fastelovend am elefte em elefte an. Ävver su richtig loss jeht ehst kuurt noh Neujohr bis zum Engk am Äschermittwoch, der nächst Johr op de iéschte März fällt.

Bei dä Jodesberger Stadtsoldaate fängt de heeße Zick mit däm Ordensfest an, bei däm jede Aktive singer neue Orde kritt. Dann jet et wigger met enem janzen Deil Veranstaltungen wie de gruuße Prunksitzung in de Stadthall von Jodesberg, bei dä am 29. Januar 2017 vür üvver siebenhundert Minsche de crème de la crème us em Kölsche Fastelovend ufftritt.

Extra un nur für de Kääls maachen de Stadtsoldaate am 12. Februarr ihr Häresitzung. De Määdche wullen und bruchen net zorückstonn und dofür jiit et de Mädchesitzung am 14. Februar, wo üvver 500 Mädche sech e doll Sitzungsprojramm anseen und metfiiere. Für de Paänz jitt et auch jet: Et Kinderkostümfest am 11. Februar, wo de Pänz sprenge un speele künne.

Jejen Engk vun de Fatselovendszick kumme de dollen Daach, an denne och op de Stroß su richtig gefiiert wed. Am Donnersdaach vür Äschermittwoch, dem Wievverfastelovenddach, nächst Johr ist dat am 4. Februar, kamm me in dä janze Stadt maskierte Minsche sehn. An däm Daach müsse de Männer op ihr Krawatte oppasse, denn de Wievver  schniggen de aff un heften sech de Stücke an. Dat is e bissje su we fröher in Amerika bei de Indianer, die han och de Lück skalpiert un sech dann dä Skalep an de Jürdel jeheff. An Wievverfastelovend de Stadtsoldaate trecken met ihrer Kapell dürch de Stroße vun Jodesberg un begleiten och et Prinzepaar, wenn et op de Wievversitzungen oder in Altersheime  auftredde deet. Zur seleve Zick marschieren de Stadtsoldaatepänz mit däm kleene Prinzepaar zu dänne ihre Auftridde, z. B. in Schülle, Krankehüser und Altersheime.

De avsolute Höhepunk vum Fastelovend ist am Karnevalssonndach (26. Februar 2017) de Zoch durch Jodesberg. Ävver vür dem Zoch wierd ehts emol dat Rothus un damit de Maach vun dä Stadt vun all de Funke jestürmt. Och de Stadtkass wierd jeplündert, ävver do is nie jet drin!

Noch däm Rothussturm jeht dä Fastelovendszoch los: met mie wie 2.000 Deilnemmer, 100 Fastelovendswaje, üvver 100 Reiter mit Päd un üvver 30 Musikkapelle is dä Fastelovendzoch dä krönende Höhepunk vun de Fastelovendszick. Tonne vun Kamelle un Schokolädche suwie Berje von Strüssjer schmiessen de Zochdeilnemmer, domit die mie wie 25.000 Zoschauer jet in ihre Büggel stecke können.

Am Rusemondaach (27. Februar 2017) wierd et in Jodesberg jet ruhijer. An däm Daach jeht dann in Bonn dä Post avv beim gruuße Rusemondaachszoch. Ävver ehrs recht tob dat Levve in Kölle, wo dä gruuße Zoch rund um dä Dom mie wie 1 Million Minsche seen wulle.

 

Am Äschermittwoch is alles vorbei, dä janze Fastelovend ist dann am Engk. In de Kneipe und Esslokale jitt et dann wie sick jeher Fisch zu essen. Un de richtige Karnevalsjecke, die in enem Vereen sinn, han e  kleen bissje Paus bis dat et im März wiggerjeht mit dä Vürbereitungen für de nächste Session.

 

Silke Rest